Winter-Weekend

Das Winterweekend 2012 schriibt sini erschte Schlagzile scho bevors überhoupt agfange het. Im Gägesatz zum Vorjohr hets hüür meh aus gnue Schnee ir Schwiiz. So hetsech die erschti Gruppe ufe Wäg gmacht uf Grinduwaud go d’Piste unsicher mache. Doch haut…es fäut no öpper!!! D’Jaqueline het ir Nacht ufe Samschti no gschaffet, wos Fürobe gäh het, hetsi feschtgsteut das ihres Outo koplett ungerem Schnee begrabe isch. Nachemne mehrminütige Versuech das Outo uszbudle, ischere das z’blöd gsi. Churzerhand hetsi d’Schneeschue montiert u isch Hei gstampfet. Ihri Schii si im Outo igschneit blibe. Us luuter Herie hetsi de dr Wecker am Morge o uno verpasst. So hetsech de d’Pisteroudigruppe ohni Jacky ufe Wäg gmacht.
Es bitzeli spöter isch de Gruppe zwöi, mit Jaqueline, abgfahre. In Interlake hets de ä lengere Haut gäh. Am Wiehnachtsmärit hets vili schöni Sache z’bestuune u z’choufe gäh. Jojo, die cheibe Chrippe mit däm wüeschte Jesuschindli het scho am meischte z’diskutiere gäh. Nach langem Hin u Här hetsech de Cördle doch no entschide die Chrippe z’poschte. Sogar dr Gäutoutomat het noeinisch nochegfrogt: „Wollen Sie diese Krippe wirklich kaufen?“
Ä Chrippe, schwarzi Schof, Hirte u schüsch no Züügs hetsech i de Täsche agsammlet, aber ä passendi Chappe für d’Margot heimer trotz intensiver Suechi nid gfunge.
Am Nomitag heimer üs de aui im Hotel Eiger troffe. Die Einte si no id Sauna go schwitze oder heisechs im Pool lo guet go u die andere si go d’Lädeli unsicher mache.
Langsam aber sicher hets Hunger gäh. Im Barry’s heimer de ou üsi reservierte Tische gsuecht, aber nid gfunge. D’Herre vomne Fuessbauclub wäre so fründlech gsi u hätte üs mit Fröid a ihre Tisch gno. Das hättne äue no so passt…;)
Uf jede Fau heimer de doch no dr richtig Wäg zu üsne Tische gfunge. Einisch meh heimer üs vo dr super Chuchi dörfe lo verwöhne. Egau ob Salatbufffet, Suppe, Cordon-Bleu oder Fondue-Chinoise, es het für aui öpis gha.
Mit übervoue Mäge hetsech de d’Mehrheit ou scho richtig Bettehuuse begäh, die andere si no go e Schlummertrunk ha.

Am Sunnti Morge het das super Zmorge-Buffet uf üs gwartet. Die Einte chlei früecher die andere chlei spöter, aber aui si uf ihri Chöschte cho.
Ab uf d’Piste hets när gheisse.
Die gmüetlecheri Gruppe z’Fuess ufem Terrassewäg u d’Gruppe „Piste-Raser“ mitem Balancer ufem Schlittuwäg. Das scho fasch legendäre Sunntigs-Abentüür mitem Kari isch ufem Programm gstande. Egau ob Afänger oder Fortgschritteni, jedi het e gueti Figur gmacht uf oder näbe däm Schiistüehli. Es het scho die einti oder anderi Badwanne gäh, aber wius so viu weiche Schnee het gha si aui Stürz ohni Fouge blibe. Sogar mit vereinte Chräft heimer müesse Turnerinne us ihrere missleche Lag usezieh. Tja, das chunnt drvo weme vom Wäg abchunnt u s’Bord abetrolet.
Aber fürs Highlight vom Tag het dr Kari u üsi Präsidentin Barbara gsorget. Üse Schiilehrer Kari het gmeint: „Dä Stutz hie isch e chlei steil, mir tüe hie düre Töifschnee uf d’Schiipiste traversiere!“
„Immer schön s’Gwicht nach hindere verlagere!“ seiter u fahrt los, aber nid wiit u dr Kari macht sini persönlechi Badwanne oder isches ä Schneeängu gsi?
Wahrschiinlech hetsech d’Babs dänkt: „Das cha ig ou!“ Vouer Elan schwingt si sich ufs Böckli u düset ab. G’Ändet het de das ganze imne rise Glächter. Ä Abflug vom feinsten, sägi öich…
Mhhh üses Schnee-Babsi 😉

Am spötere Nomitag heimer de üsi sibe Sache packt u üs ufe Heiwäg gmacht.
Vili luschtigi Erinnerige, Dekomateriau, sogar ä Chappe für d’Margot u zum Teil lääri Portmonnaie heimer heignoh vom Winterweekend 2012.
Michaela Huwiler