Am Samschti, 6. Juli, si mir z’Wange a/Aare am 9.00 Uhr abholt worde. Mitem Schneider Car si mir de nach Hohenems gfahre. Ca. am 12.45 Uhr si mir dört acho und hei im Schuelhuus üses Zimmer bezoge. Zäme mit de Langethaler u de Ämmitaler Froue hei mir üs hüslich igrichtet u aschliessend si mir de Dornbirn go erkunde. Überau hets Bühnine gha wo Live-Bands gspielt hei. Mir hei üse erscht Abe sehr gnosse u si de ou nid grad z’spät is Bett. Uiii isch das es Grangg gsi uf dene Luftmatratze u bi 12 Froue i eim Schlag hed de ou die einti oder anderi gschnarchlet.
Am Sunnti hei mir üs de parat gmacht für üse gross Uftritt ar Eröffnigsfiir. Mit öppe 3’050 andere Schwizer (die gröschti teilnähmendi Nation) hei mir wöue iloufe. S’Wätter hed üs aber e Strich dür d’Rächnig gmacht. D’Eröffnigsfiir hed wäge Schlächtwätter und Sturmböe müesse abgseit wärde. E chli gfruschtet hei mir üs vom Messegländ us ufe Wäg zum Bahnhof Dornbirn gmacht. Was mir dört erläbt hei isch eifach genial gsi. D’Lüt wo eigendlich die iloufende Nationen hei wöue luege hei üs zuegjublet, abklatschet, Hopp Schwiz grüeft und üs gfiiret als wäre mir vomene Königshus. Mir hei dört es Schwiz-Öschtrich-Fescht gha – eifach super! Am Abe hei de d’Hohenemser e Willkommensparty für üs organisiert. Ufemne grosse Platz isch e Usse-Bühni und es grosses Zält ufboue worde und aui hei (denn no) Fröid gha, dass soviel Schwizer bi ihne Logie bezoge hei. Si hei üs ou e Fröid wöue mache indäm si d’Francine Jordi angaschiert hei. Mir hei de nid aui so Fröid gha. Nichtsdestotrotz hei mir dä Abe sehr gnosse.
Mir hei de i der loufende Wuche 4 Uftritte gha. Am Mändi, Zischti und Donnschti am Namittag und am Mittwoch-Abe am Dornbirn-Spezial. Üsi Vorfüehrige hei mir im Casino Stadion in Bregenz gha. Mir hei üs sehr drüber gfröit, bi aune üsne Uftritte bekannti Gsichter uf der Tribüni z’gseh. Danke vielmou: Helene, Oliver, Ursula, Alexandra, Erika, Hans, Stefan, Marianne, Theo, Susi, Walter, Renate und Heidi, dass dir üs sid cho luege. Es isch eifach grad no einisch schöner, wenn eim öpper vor Tribüni us zuejublet. Mit Ach und Krach hei mir de ou nomou Zit gha, d’Vorfüehrig vor Ursula go z’luege, wo mit ihrer Gruppe i dere Halle es sehr schöns Barreprogramm zeigt hed.
Am Mittwoch, üsem einzig freie Tag, hed de die verschobeni Eröffnigsfiir stattgfunde. Es isch idrücklich gsi, e Teil vo dene vielne Schwizer z’si wo uf der Birkewiese füre Imarsch igstande si. Es Meer vo graue Hüet, rot-schwarze Trainer, Schwizer sowit wie me gseh hed. Ungloublich schön isch ou der Schwizer Abe u d’Fig Gala gsi. Wunderschöni u hochstehendi Vorfüehrige hei mir dörfe luege und mir si mega stolz uf welem höche Niveau mit Hüehnerhuteffekt üsi chlini Schwiz turnet.
Scho gli isch üsi Wuche am Ändi zue gange. D’Michèle hed de no derfür gsorget, das ou die obligati Gymnaestrada-Fahne no mit heicho isch. Churzerhand isch si uf d’Latärne klätteret und het eini klauet und wöus so schön gsi isch, hed si no grad e zwöiti abegholt. Mir hei e schöni, luschtigi aber ou e sehr aschträngendi Wuche erläbt, viel schöni, nöii Fründschafte gschlosse und alti chönne pflege, mir si imene super gaschtfründleche Land empfange worde und hei gässe wie d’Fürschte und Kafi mit Neidlen trunke (gäu Sibylle). Alles in allem si mir dankbar, das mir die Wuche zäme hei dörfe erläbe.
Sibylle, Fabienne, Michèle und Marianne H.