Vereinsreis DTV

Üsi hürigi Vereinsreis het üs am 7. und 8. Septämber is Bärner Oberland gfüehrt. Am Samschti Morge am haubi nüni hei mir üs bim Schuelhusplatz troffe. Mir das si d‘Manuela, d’Petra, s’Hugi, d’Cordelia, d’Barbara, s’Angi, d’Tamara, d’Sibylle, d‘ Marianne u i.
Vo Attiswil us si mir mitemne Bussli und eim Privatauto nach Interlake gfahre. Z’Interlake Ost acho hei mir no chli Zyt gha bevor üses Schiff gfahre isch. So hei mir e Kafihalt im Hotel du Lac gmacht. Gmüetlech bi Kafi u Gipfeli si plötzlech zwöi mit Holzkunstwärk derhär cho. Leider isch nid genau ersichtlich gsi was die söue darstelle, mir hei de gfunde es chönnte ägyptischi Finnecherze si 🙂
Am Öufi si mir mitem Schiff bis Giessbach gfahre wo mir s Bähnli zu de Giessbachfäll gno hei. Nachemne churze Spaziergang zu de Wasserfäll, hei mir die ou uf der Terrasse vom Grandhotel Giessbach nomau chönne bestune bevor mir der Fuessmarsch zrug zum Schiff uf üs gno hei. Mitem Schiff isches wider zrug nach Interlake gange. Dört hei mir üs d’Zyt no chli mit shoppe vertribe. Zwüsche Portemonnaies, Täschli u Schmuck het d’Sibylle no High Heels aprobiert. Was üs aui sehr erstunt het, isch dases überau wo mir gsi si ou extrem veu Froue mit Burkas gha het. Die si s’ganze Wuchenänd üses Gsprächsthema gse.
Wo mir vom ganze ichoufe afang echli müed gse si, hei mir e nächschte Halt uf der Terrasse vomne Restaurant gmacht. Komisch die rede da Englisch mit üs nume wöu d’Cordelia es Cola zero bstellt het 🙂 Luschtig hei mirs gha, da chöme plötzlech es paar Jungs derhär wo e Polterabe fire. Mir hei chli mitne plöiderlet, es Schnäpsli trunke u d’Cordelia het am Schluss sogar eini vo ihrne Locke am Brütigam gspändet!
Vo Interlake us si mir nach Brienz witergfahre. Dört hei mir diräkt am See ir Jugendherberge üses Zimmer bezoge. Mir 10 Froue aui im gliche Zimmer das cha ja luschtig wärde. 
Zum Znacht hets Salat, Bratwürst mit Gmües u Härdöpfeli (für die wos no glängt het 🙂 ) gä u zum Dessert es feins Schoggimousse.
Da mir vom Znacht aui nid würkli satt si gsi hei mir der räscht vom Obe ufere schöne Terrasse am See verbrocht u hei es Dessert gässe.
Der 2. Tag vo üsere Reis hei mir mitem z’Morge i der Jugendherberge gstartet. Nachhär si mir ufe Ballebärg wo mir der räscht vom Tag verbrocht hei.
Gäge Obe hei mir üs de wider ufe Heiwäg gmacht. Uf der Outobahn im Stou het üsi Burkina :-)sogar no chli mitem Marco (emne junge Typ usem Aargau) gflirtet. S’flirte isch so heftig gsi, das der Marco ihne sogar zum Alponte gfolgt isch u d’Handynummere vor Burkina wöue het. I säge öich das isch es Glächter gsi!

Üsi super Reis hei mir bimne Pizzaplousch im Bäre gmüetlech lo usklinge. Dört isch nomau veu glachet worde über das wo mir am Wuchenänd erläbt hei u über d’SMS vom Marco!
Merci nomau ar Manuela u Petra fürs organisiere vo dere super Reis.

Fabienne Hohl